蒙古大夫

前晚

B頭，翩翩，緣緣

3條友突然圍剿Mina

我抱起肥婆min

摸到肚下有舊嘢，有臭味

有塊嘢已結焦

我估係乳腺發炎

用iodine消毒

再搽獅子膏

再餵1粒消炎藥

今早

傷口已平

火要返工

我單手再做一次消毒程序

mina淨係黐住我

mina食藥後無胃口

嘔了幾次

要搓爛貓餅

用粗針筒餵

食完嘔到一天一地

所謂AL

全早公司電話＋what 

老豆今午又出院

 6:30 OT 回家

又嘔一笪

Mina罕有地瞓到唔接門

火洗碗時

mina才瞓醒去排隊等開飯

正常了

愛惜自己

有個斯文瘦弱女仔

S型咁暈在地上

完全無人理佢！

我大聲問

有無人同佢一齊？

無人應我

然後

有人跑上站頭揾職員

我嗌個女仔

女仔反白眼無反應

我不停攞膠快佬

幫女仔搧風

除抵佢口罩等佢有新鮮空氣

站頭職員到

叫我幫手扶起女仔

我跪在地上

一邊大脾戥起

俾女仔挨住我大脾

我另一手扶住女膊頭

不停幫佢搧風

等白車到

女仔塊面青得恐怖

期間

站頭女職員

一直揑住女仔左邊虎口穴位

然後

我發現2尺附近

有個男人在講電話

拎住個女人手袋

但無打算行過來

只不停講電話

女仔慢慢醒

我話：

＜唔使擔心，你無走光，白車到咗

你係咪M暈？定肚餓？＞

女仔擰頭

站頭女職員問

有無人有水？

那講電話男人從女人手袋

攞支水出嚟交俾我

我就用樽蓋餵女仔飲水

那男人繼續講電話

無行近，無踎底

站頭女職員問佢係邊個？

男人答係女仔男朋友

我完全忍唔到

＜DLLM! 乜L嘢男朋友嚟㗎？＞

站頭女職員都擰哂頭！

我地路人甲仲緊張過佢

白車哥哥到

女仔同我講唔該

我話

＜你無事，唔使驚，

下次我有事你幫翻我咪得囉

我趕去醫院睇老豆……＞

女仔微笑點頭

白車哥哥問女仔病歷

我唔應該聽私隱，起身走

站頭女職員拍我膊頭

<唔該你呀，阿dee……>

我話

＜咪玩啦你！我係姐姐呀＞

女職員望下我個胸

＜sorry, sorry, 點都唔該你＞

我𥇣住那電話男！

女仔

希望妳無事

快d換個愛惜你的男人

依家呢條仆街唔要得！

Staycation

老豆

叫我買醫院抗生素

根本就係要入廠

但自己諗方法死頂

逃避唔入

結果

昨日醫院覆診

我同醫生夾好

今早夾老豆入廠 

老豆係要發惡

昨晚的士回家

老豆話無尿片＋ 冇餸食

 又勞役媽咪腳痛落去樓下

買尿片，買小炒

我昨午同老豆覆診後

趕住要返夜

 

老豆發媽咪脾氣

 話迫佢入醫院

我哋兩母女就好開心

 入廠好似搬屋一樣咁多嘢

媽咪

脊椎骨壓骨，壓扁神經線

下半身痺痛

老豆入院後

媽咪去針灸推拿

然後約她的小學同學聚舊

平時老豆在家

媽咪＝阿四

我趕返工

好攰好攰

爸媽各自staycation

憨居蝕底的舊式女人

媽咪腳痛麻痺

針灸，推拿，中醫，止痛藥

乜都試過，唔得

我叫媽咪試我chiro

星期六

去chiro接媽咪

我頸椎移位，去這醫生6次

完全未見過的新姑娘問我

你係咪＿＿＿＿？

我話你點知我係＿＿＿＿？ 

姑娘話：醫生講的

我不悅💀

黑面無應姑娘

我條氣唔L順！

如果那姑娘揸住我病歷

咁嚟問我， 我可以接受  

但我嚟接媽咪 

你揸住我媽咪病歷 

問我係咪＿＿＿＿？

咁這診所就好大問題

閂埋門 

講客人八卦嘢 

我地team同事都會

但姑娘突登走出嚟咁問我

仲要爆話醫生講 

咁姑娘就又柒又無規矩！ 

病歷有齊我

中英姓名，ID，年齡，住址，職業 

我焗住不能出聲鬧人

如人地發癲將我資料擺上網 

我就麻煩！ 

我決定不再去 

亦已幫我媽轉另一chiro

你老味吖🔥

今午3:00 

同媽咪照私家甲狀腺超聲波

老豆明知媽咪腳痛

仲點媽咪落街買printer墨

係要上網download月結單

再print出嚟 

再點媽咪去交上網＋手機月費

媽咪掛住落去買墨 

忘記攞醫院A照超聲波轉介信

飛的士回家攞 

再飛的去佐敦私家

媽咪情急

又攞錯醫院覆診紙！ 

我在佐敦等呆媽咪1h 

無醫院A轉介信

私家唔肯照！ 

我摷Whatsapp 對話

證明我真譯過醫療報告

媽咪係有甲狀腺有結節

我低聲下氣同姑娘講

媽咪腳痛

唔想媽咪行多次

可否後補轉介信？ 

醫生睇what後肯照 

媽咪撲出撲入好辛苦

我同媽咪4:00擔擔麵 

順手交埋smartone+PCCW

 一路食一路狂片佢

成世人俾個男人鉗制操控

你唔識say NO?! 

攪到自己d嘢亂哂龍

媽咪話

明早去補交轉介信

我話

你使咩咁緊張?

錢我都俾哂, 你驚佢唔俾報告我? 

我會處理啦...

細時我發高燒

老豆打牌唔理

媽咪孭我去急症室

打兩份工幫我交學費

死慳死抵請補習哥哥

帶我去西餐，海洋公園，學游水

俾個傳統舊式女人吹漲！

但我會盡力保護佢，愛佢

將自己能力做到的都盡量俾佢

2021中秋

 中秋

9:30油麻地開工

11:30媽咪腳痛脊醫

12:45同媽咪午飯

落狗屎，醫院📞我, 話老豆可出院過節

13:00雷暴截的士難，媽咪心急回家等老豆

15:30柴灣開工

17:30去接火收工, 回媽咪家做節

原本想有30分鐘me time 放空

但公司不停what, 要回覆

19:00 可能是最後一次齊人做節

老豆媽咪想食榴槤

月亮很大很圓

上次老豆出院

他覺得我出入醫院用了很多錢

塞幾百蚊俾我, 我唔要

媽咪話

車錢都未夠啦, 幾百蚊? 把鬼啦...

今次

老豆又塞利是俾我+火

火話

要我批准先要得

否則袋咗回家實死梗

我見係100

叫火袋住

媽咪買俾老豆的T裇

飯後

我, 洗碗+晾衫

火, 倒垃圾

可能是最後一封老豆親手俾的利是

我買俾自己的恐龍燈籠

叫火砌俾我

一切只能盡做

攣變直

之前

為了方便做事

手指長年累月插在機上

班癲狂人用手指做跳板

由地下跳上衣櫃頂

又或者打交時

成個屁股碌落嚟

砸到手指

總之

某晚突然手指攣咗瓜柴

嚇到瀨屎

因為由2008開始

寫的blog

全部存放這手指內

兄弟電腦神童大力

拆開手指

將斷了的線位焊接

1日幫我攪掂

將舊手指的餡

過哂入新手指

安樂哂！

去大力家攞新手指時

大力質一大包蕃茄薯片俾我

我俾幾個狗仔囗罩大力

我對朋友這定義

好緊好窄

只要我確認某人是朋友

赴湯蹈火兩脅插刀

咩都得

聽天由命

星期五

醫院B，絕頂好的治療師

來家跟進

發現老豆B/P上壓得67

於是

又寫referral 入醫院A

 今早

醫院A主診醫生電我

話老豆長期肺炎＋慢性支氣管炎

已成慢性肺阻

肺已經完全爛哂

都係重覆發燒入院打抗生素

無得攪

病人只有死拖捱苦

醫生叫決定去到最後一刻

是否施行急救？

即插喉，心外壓

因老豆瘦到得棚骨

急救會插穿氣管＋壓斷肋骨等等風險

老豆情況

就如火媽當年慢性肺阻100％一樣

醫生過年問火大嫂叫決定

然後火媽5月就走了

醫生話老豆自己要知要同意

所以

醫生今早是先同老豆講了

才電我再講

叫我同媽咪商量

飲茶時

我同媽咪轉述醫生的話

媽咪9秒9話唔救

但不會主動同老豆商議這敏感話題

媽咪話

老豆連老人院都不甘心入

同佢商量唔救？！ 

老豆不是豁達的人

只會誤會兩母女厭棄＋見死不救

所以

老豆自己唔提

就無謂越攪越禍

如果

你知媽咪在家點服侍老豆

你就知媽咪有幾辛苦

媽咪覺得

自己可以撐住死頂照顧老豆

上次Y事後極度嚴重抗拒請工人

只同意鐘點姐姐每星期來2次

但其實媽咪自己都要人照顧

我不想此時嘈交

媽咪思維同當年火媽

一模一樣

自己死頂照顧火爸

不肯請工人

直到火爸坐熱氣球後

火媽自己都走下坡

才開始接受請工人這事實

先同媽咪飲茶

再攞湯＋尿片去醫院

買俾麻雀精老豆的

買俾媽咪的

買俾火的

無論點

我都會盡做