19
本來約了好兄弟H
行街。食嘢。傾下偈。呻下
點知媽咪又話咳要睇醫生
老豆又話要打肺炎疫苗
於是早上就同他們去私家醫生
搞掂又話要飲茶
媽咪爭埋單
爭俾的士錢
無攞手叉搶住出去攞點心
我有得佢
我放棄
費事阻止佢又發脾氣
到時又係我受靶
12:00攪掂
送父母上的士
公司手機不停響
有好多what要覆
H話你放唔放假都一樣
然後H商店內買嘢
我就坐低做自己appraisal
因為根本冇時間做
20
放學後
同老豆去換身份證
早前因為老豆不停入醫院所以冇去
我只得15分鐘時間
坐低食碗雲吞麵
用500蚊畀錢
那個夥記居然話
＜今日咁撚柒多500蚊紙㗎？＞
我即刻著火
我話
＜咁你咪撚柒收囉
你舖頭貼張紙出嚟
寫明唔撚柒收500蚊紙咪得囉！
你打開門口做生意
咁樣講粗口鬧個客
不如你咪撚柒做啦！＞
個伙記收哂皮
返2號坐電梯
撞到樓上師奶
佢面色萎黄+轉戴假髮
一睇就知有事
師奶話好耐冇見到我
我話時間大家唔同
跟住我話
我俾個蘋果你
我買咗10個
阿水又係唔做家務
就係坐住睇我摺衫收衫
象b負責看管遙控
象b係女仔
花傷口好靚
買了新的蒙古包俾花保暖
我叫自己唔好成日去菜檔
費是重蹈覆轍
招惹街坊話柄
菜檔仍然由得我自由出入
每次買菜都唔收我錢
但係我一定要畀錢
我在菜檔的時候
心內非常放鬆
環境好嘈雜
但係我個心好平靜
我會執好紙皮發泡膠箱
執筲箕及價錢牌
再用掃把把掃地
當然同我的衣著格格不入
但是反而我的心很平靜
有時睇住阿花食完嘢
洗完碗我就走
菜檔各人
信我人品不會做衰事
由得我。唔會理我
總之15分鐘內一定離開
感覺就如當年去火家一樣
火爸火媽不會理我
我可以好放鬆好自在
我事實內心裡
亦對火有內疚虧欠
火咁樣出心出力出錢對我父母
反而父母咁label我地兩個
話我夾埋個男人謀佢地層樓
話我唔掂問人借錢頂住死撐
死都話火係外人
跑醫院跑老人院屈我地有怨言
不論點樣死做
生安白做質我地N條罪名
這根本是個死局
火半句怨言都無
照舊見到啱父母食的照買
照常㷛湯
叫我唔好理媽諗乜講乜
買薯片朱古力俾我放鬆
聽我呻。聽我喊
我除了洗衫摺衫。吸塵拖地
煮飯。洗碗。倒垃圾。湊仔。買廁紙
火全部做哂
我已經用盡各種方法
去令自己內心平靜
我只能用各種怪雞騎呢的方法
去幫自己減壓自救
我好辛苦
我好攰
某星期日
攞湯去老人院之後
回家午飯
媽咪腳痛
係要又買又煮
話火過門都係客
而且
俾咗家用就要煮飯俾我食！
我話
邊個做客會幾年來
幫手跑醫院攞尿片
攞食物去老人院
逢星期日煲湯?
然後
媽嚟料
再天馬行空
話我週圍借錢
又話我問佢攞錢
話我荷包唔掂
但我從來冇問過佢攞$1
又話如果火有怨言
應該一早
問佢每星期攞返煲湯錢食物錢車費
事實上
我+火
絕無怨言
事事盡力做
然後
老豆聽完媽講
去到老人院老豆又問發生乜事？！
放工同媽視像
繼續鬧
怕了再鬧
扮開工
媽反而關心
就算再怕
都一樣要請假
同父母去處理事項
老豆話中學同學過身
自己都未顧得掂
媽
情緒反覆
我好大壓力
💀💀💀💀💀
同步
仆街上司
不停搬龍門
💀💀💀💀💀
總是覺得自己很樣衰
心情極差
又去剪頭髮
近日轉了另一個髮型師傅
他們有貓
舊髮型師傅發現了我做邊行
所以不會再去
我同新師傅講
好唔開心。好攰。好辛苦。好大壓力
新師傅問點解?
我苦笑冇答
師傅叫我唔好唔開心
攞咗兩粒糖畀我食
然後我就開始喊
我心口乸住好翳痛痛
唔想唱歌
唔想做運動
我知抑鬱症又發作
除了死做死頂
念經求佛祖幫我
我叫自己一定要放鬆
唔好理。唔好諗
由得佢哋啲人發癲
不論我老細或者我阿媽
都不能坦誠理性地溝通
一個幾十年來呼風喚雨戀棧權位
一個孤寂老人周身病痛胡思亂想
我已經好努力死頂死做
唯有收聲
真係頂唔順
又去買酒
放工返嚟飲一啖
放鬆
都係嗰句
就算喊死
都要努力爬起身
繼續向前行
29
請假
帶水去打防疫針
的士司機話
佢bb嚟㗎？
幾多歲？
咁大聲嘅？
我話
應該6歲
＜咁老應該唔會叫㗎喎……＞
我心諗
你老婆咁老就唔會叫
🤬
水
4.69kg
居然肯俾醫生摸勻全身
頸瘤完全消失
只係㗅㗅㗅
無打人
我話No
水就收聲
醫生話水馴化咗
＜幾個月就肯俾你剪指甲抹牙
你都好好嘢……＞
打完針
呆呆地
30
幫花術前預備
1棄掉舊屋仔。攞mina張粉紅色俾花
2剪指甲
3 驚花發狂走甩 買箍身頸帶
4 用布全新身幫花抹乾淨
花
2.88kg
醫生目測8個月大
超長松鼠尾+耳毛外捲飛出+勁大力
應該溝咗外國種
應該仲會再大隻d
醫生話
花其實好黐我哋
檢查的時候好乖好定
但當我們離開了
阿花就開始有脾氣
3:00出院
我同火
先回2號回氣
水好八睇花
手術後攰
在門外瞓咗
因為去其他地方做手術
只係幾百蚊
但我慣常去的醫院
醫療費非常貴
但是
醫生質素及藥物非常好
我驚檔主嫌貴
他日如果阿花再有病時
唔肯再支付醫療費
所以我叫醫生分單
我只係收檔主手術費
其他雜費藥費吊鹽水防疫針的士
我私下支付了
護士話
＜你份人真係……＞
哥仔不在
叫阿姐俾錢我
另塞一封利是俾我們
話一定要收
利利是是
7:30pm
麻醉藥過
我驚花手術後不夠營養康復
俾罐頭佢食
我只係希望阿花好
傷口乾爽
餵藥順利
順手抹牙牙
舊籠鎖爛
換個新俾花
其實我真係好忙
水
由一隻豬
變了一隻大笨象
可以抱
可以錫頭頭
可以剪指甲
可以抹牙牙
但唔肯飲薏米水
水同mina兩個三色
永遠行過就嘈
mina 17
上次身體檢查後
絕不再開刀
好瘦
想佢頤養天年
之後轉了一隻頗貴的雲芝
晚上食半粒
精神及胃口都變得非常好
開大亦多了
早上食半粒冬蟲草
當年Dr. N推算B頭是2007聖誕出世
所以已經16歲
幾年前已確診腎衰竭
仍然是小朋友思想
就是玩食瞓
除了瘦
仍然日日飛簷走壁
阿水最鍾意黐住B頭玩
以前翩翩日日坐大脾陪我踎塔
翩翩坐熱汽球之後
B頭日日陪我踎塔
B頭
早上食冬蟲草
晚上食雲芝
緣緣
有個小肚腩
但感覺仍然是瘦
仍然是舐毛
如阿水發我脾氣
緣仔就會打下水屁股
緣緣一樣
早上食dd冬蟲草
晚上食dd雲芝
阿緣有時會同阿水一齊
這個小黑人
晚晚同我爭枕頭瞓
今早
鬧我轉側郁住佢
在我右邊面劃咗4個小血坑
即刻揸娥羅納英
1劃在右眼蓋
另1劃距離右眼下半吋
花花是最新駐場小公主
兩個老細為了desex
一個話要留種
一個不想留種
遲遲未決定
但花花經常想出街
天氣太凍
我幫花花著衫
昨日哥仔同我講
叫我帶花花去desex
上次水豬醫療費冇人提過
今次佢哋取態明確清晰
醫療費及車費都俾返我
我也理性收下
今次
我同自己講咗3000次
千祈唔好再沉船
由2019開始
老豆排政府老人院
2022年9月
入了好好私院
單人房
飯餸 環境清潔 服侍 交帶 態度
各樣都好好
今年頭
收到通知信
派到屋企附近5星級政府院
即媽咪老人中心樓上
老豆以前也是去這老人中心
所以
政府院+老人中心上上下下
全部都識老豆媽咪
老豆參觀後。唔去
原因
5人房 飯餸麻麻 已適應好好私院
因這是老豆終點站
所以
我同媽咪俾老豆自己決定去留
12月
請假4次
同老豆去醫院不同科覆診
上星期日
媽咪話今星期會凍
問老豆在老人院是否夠褸？
老豆話夠
不用再帶去
昨晚
老豆又話唔夠衫
叫媽咪攞衫去
我話
得10°C
不如改期照肝膽
老豆唔肯
於是
今早攞住厚衫厚褲
走難咁去接老豆去醫院
寒風凜冽
返工時間
個個搶的士
有個阿伯震騰騰
揸住士的等的士
雖然我趕時間同老豆去醫院
但我冇打算同佢爭
有架的士到
忽然有一男一女
在另一邊門跳上的士
我拉開左邊門
扶阿伯上的士
的士司機仲要鬧我
做乜拉開佢車門
條八婆同我講
＜我哋上先㗎喎 ！＞
我話
＜阿伯吹風等的士好耐
你畀佢上先！ ＞
然後
我扶阿伯上的士
佢老公不斷指住我炒蝦拆蟹
我一句都冇應佢
眼尾都無望佢
阿伯不停同我講唔該唔該
我話阿伯你坐穩
司機要開車
然後
繼續拖住老豆截的士
嗰兩公婆不斷在對面馬路屌我
我完全當聽唔到
我目的
幫阿伯上的士+我老豆去醫院
阿伯冇人傍住
老豆有我傍住
就係咁簡單
其他我乜鳩都唔理
費事節外生枝
換咗係平時
以我脾氣
肯定屌到佢兩公婆反艇
最憎人恰老弱傷殘 貓狗
🤬🤬🤬
兩公婆
一路屌一路行去另一邊截
忽然間
佛祖獎架的士俾我
順利到醫院
老豆有慢性肺阻
醫院A
幾年前
已經話老豆嗰肺爛曬
人好精神
食得瞓得
仲識睇醫院指示牌話我行錯路
但每咳一啖痰都全是膿血
11:00照完
的士送回
點對點接送
勿冷病老豆就好
我趕住開工
我只能盡做
近期
瘋狂追這電視劇
我
不是律師
不是警察
不是社工
不是記者
不是教師
工作性質完全同劇中故事無關
但是
睇時
非常有代入感
有人的地方
就有權力鬥爭
好難安靜專心做事
有幾場
我激動地喊
因為
我明白劇中人內心的掙扎
永遠是良知vs辦公室政治
妥協就範有糖食vs做黑羊被孤立
踩住別人傷口向上爬vs雪中送炭
奮不顧身衝入火場救人vs剝花生
被高層點名孭飛vs深耕做小薯仔
不停追逐名利權勢虛名的伴侶
vs
對你警醒令你忠於自己的伴侶
我個仆街老細
成日叫我在高層面前出現
等高層記得我
我唔肯食政治飯應酬
收工就走
但餐餐高層有緊要嘢要做
就叫我老細調我去食
高層仲要每次見到我
都叫得出我個名+要同我影相
我不喜攀龍附鳳or趨炎附勢
更不會過河拆橋or落井下石
偏偏要在個大屎氹揾食
對上一次瘋狂追電視劇
已經是2011的<天與地>
之後
全套翻睇了4次
入哂血
我一路睇
一路同火話
＜我同你一齊咁多年
係真係有原因……＞
24AL
所謂放假
由8:00開工至13:00
回家用手指再做到19:00
25早上返學
習主席vs Joe Biden
鏡頭上握手
實質上不停減持美債
有同學問
點解有d國家的警察
永遠在暴亂時開槍射眼？
我話
因為頭及心是Alpha致命位
手腳是Beta非致命位
如果用橡膠子彈射眼
可以有阻嚇力
致盲但不死人
以巴停火幾日
釋放人質
但醫院無電無水無藥
根本上老弱傷殘都是等死
26
接老豆外出午飯
食完老豆話要配眼鏡
之後我+火趕去洗牙補牙
回2號已天黑
不停上網追睇＜新聞女王＞
我不理人們對此劇的評論
總之
我就是覺得好好睇
返工就是揮之不去的魑魅魍魎
27AL
起身洗了床單被鋪+吸塵拖地
忽然想放肆
飛的士去買飛
趕緊吃個泰飯
我暗地裡同自己講
如果明天突然猝死
今天AL
也總算是享受過
對自己好過
這些年來
對公司對父母對貓頭s
我不是已經很努力的做嗎？
我不是已經很笑面迎人嗎？
這套戲
完全不煽情
只是點點滴滴的
將我心內拼命遮掩的黑洞挖了出來
看到一半
心口已經開始揪住痛
眼淚直流不止
一直到完場出字幕出片尾曲
我仍然坐著抽泣
行出戲院時
我同火講
＜這十幾年好彩有你
否則我死咗好耐……＞
火話
＜叫咗你唔好睇d咁重嘅戲……＞
