順路

想買壽司返公司食
見到有個阿婆唔識點行
好矮好瘦，大耳大鼻老實人

我話：
阿Paul，你想去邊度？
阿婆徬徨無助話：
我想去xxx街市
我話：
同路，我帶你行啦，
你去探人？有無人接你㗎？
你有無腳痛？我行慢d啦...

阿婆話：
我去我個女度，攞翻張死亡證，
我伯爺公前晚走咗，
要死亡證去銀行攞錢，
出果陣無錢找數....

阿婆開始喊
我拍阿婆背脊：
阿Paul，人總有一日...
阿婆話：
我明白，但我地80幾歲
捱生捱死，對足幾十年，
突然間走咗，日頭摸呢摸路時間仲好d
夜晚孤伶伶對住四幅牆瞓唔到好難過

我話：
阿Paul, 你個女點解唔接你？
你去你個女度住得唔得？
阿婆繼續喊，欲說還休：
佢湊住個3歲，又同家公住
佢搬嚟我度，
我做工人幫佢洗衫煮飯又係死
我第一次搭地鐵嚟
我往日坐巴士嚟
我個女叫我試下坐地鐵
好彩撞到你咁好心帶我行
你係咪突登帶我行？
咁我阻你好多時間囉...
你心地咁好，祝身體健康，
你貴姓呀？


我話：
我姓x
阿Paul, 我真係同你同路㗎
你下次唔好再坐地鐵
坐返巴士嚟街市落啦


我送到阿婆去女屋企
個女開門
我好嬲，
30幾度咁熱
叫個80+老母盲摸摸撘地鐵又唔接
好想小佢！
但忍住！


我都有老豆老母
我將來都會老
將來我父母是但一個走先
淨底果個就係孤獨老人