誠話

早幾日

鐘點姐姐打電話俾我 

估計是 

媽咪令人不高興 

人哋開口辭工 

當然估中咗 

鐘點姐姐話 

近期每次上到你屋企

你媽咪就話

＜每次你上嚟，我就好驚

驚我將街上病毒傳染佢

你媽咪一時一樣 

琴日打電話

叫我唔使幫佢買餸 

今晚就打電話嚟

叫我幫佢買乜買乜 

我大廈要強檢同佢請假驚惹佢

你媽咪自己搭架的士

嚟我屋企樓下攞嘢

我嚇到死死下

攞完即刻同佢上的士推佢走 

果陣佢兩老未中招

如果傳染到就好大鑊

我就係難辭其咎……

雖然每次講明做4h

但有時我快手快腳3h搞掂

 計佢3h錢 

又冇揼佢波鐘 

佢話我做3h就走!

點解你媽咪一定要咁執著?

我又唔係做3h

但收4h錢

其實佢兩個老人家

應該係有個全職外傭照顧就最適合＞

我話 

上年18區全部區區勁爆 

又污水又排長龍撩鼻

 佢自己去我嗰區買嘢 

夜晚放工先話畀我知

我冇辦法鎖住佢喺屋企

佢有手有腳 

我冇辦法控制

根本佢唔會聽人講嘢

我以前幫人補習 

考試測驗補3h

平時冇事就1.5 h走

我明白你做事方式

我都一樣實事實做唔呃秤

所以

你唔好理佢發噏風

照舊上去一個禮拜做2次

執完錢就走 

你當幫下我得一對手

又要搵食

又要理佢兩個老人家

我搞唔掂

如果唔係得你幫手

舊年全年拎嘢去老豆醫院

我已經死咗

大家仔乸幾十年

唔通我唔知我阿媽啲衰嘢咩 

我老豆精神爽利時

一樣發脾氣一樣掟枱掟櫈

我自己亦都脾氣臭檔火爆

一家三口都一樣咁難頂

但我份人做事好公道

如果你真係頂唔順就走 

如果你頂到我媽發噏風

就繼續幫我手

我唔係冇試過請外傭

但9日就玩完

你見到張全新碌架床就知

你2019年尾開始幫我

每星期由1日變2日

我好明白打工仔有揀工自由

姐姐話

只同我見過1次面

但講咁多次電話

知我係咩人

知我辛苦

實話實說+著緊父母

北大咁遠都請假去

姐姐話自己兄弟姊妹多

可以輪流睇父母 

但我就得一對手

我話

我唔會同媽咪講

曾經同你對話 

姐姐話

係，唔好講 

你媽咪疑心大

費事你媽咪多嘢諗

我同媽咪講

你兩個已經打齊三針 

又中咗招

起碼有3個月抗體 

就算再度爆到10000單

都唔驚得咁多 

中咗招=打多一針

你事實係真係要姐姐幫手

又話腳痛腰骨痛

點樣擒高抹窗洗廚房?

根本你做唔到咁多

媽咪話

老豆而家冇乜嘢

已經可以去返老人中心全日

家務媽咪可以自己做

唔使要姐姐

可以個個月慳番幾千蚊

我話

老豆有慢性肺阻

唔知幾時又再出院入院

我又要返工

到時邊個幫你拎嘢去老豆醫院?

你做家務跌到

我又要跑醫院仲大鑊

你唔好搞咁多嘢

暫時姐姐照舊一個星期嚟2次

唔好再講!

結果

媽咪話

姐姐今日照舊有去

只肯收齊幾次掛門口的買餸錢

但係冇計那幾次的上門鐘錢 

我好話已經兩邊講盡

姐姐都算有情有義

其他要等我阿媽做化

老豆慢性肺阻

上年肺生個大膿瘡攪掂

今年兩老又一齊中招

又一次大步檻過

老豆生日飯 

買齊所有嘢費事出街人多 

做得幾多得幾多 

我能力有限